by

“Tanggapan Ke-2 Terhadap Artikel: GAM, WALI, PARTAI: Bukan Milik Pribadi”

“Tanggapan Keu-2 Terhadap Artikel : GAM, WALI, PARTAI: Bukan Milik Pribadi”
Oleh: Madinatul Fajar

Catatan: tulesan nyoe jeuet neusipreuek pat-pat mantong nyang patot, deungon syarat bek na meu-ubah sapeue lam asoe tulesan, dan beu na seunambong link u artikel asli:

https://www.facebook.com/notes/madi…

Assalamu’alaikum warahmatullahi wabarakatuh.
Saleuem mulia keu mandum syeedara.

Phon that, ulontuan lakee izin bak ureueng droeneuh mandum nyang na neuseutot haba nyoe, bahwa bak tulesan go nyoe, akan ulontuan tuleh ngon basa droe teuh, bah leubeh meusaneuet haba, dan beuleubeh dibeudoh rasa toe lom ate geutanyoe sare-sare ureueng Acheh. Peukara Acheh tapeugah lam basa Acheh.

Deungon nyoe ulon harap, ubena hase seumike geutanyoe nyang saban, beujeuet tangui keu jroh bansa Acheh. Teuma, meunyo na sipeue-peue hai nyang hana saboh kheun, beutatem ingat keulai nyang bahwa, harapan geutanyoe hana bida, mandum geutanyoe tameuharap dumpeue nyang jroh keu bansa teuh, Acheh.

Nyang keudua, ulontuan peugah keulai, dan ulon peutrang lom beujeulaih peukara nyang chit ka lon peugah bak tulesan keuphon. Nyang bahwa, tulesan nyan – meunan chit ngon tulesan keudua nyoe – lon tuleh ateueh nan droe lon, peundapat droe, dan hana lon ba ubena nan organisasi nyang na roh lon sajan. Lam basa Inggreh jih, tulesan nyoe dikheun, “personal opinion”.

Deungon nyoe ulon meukeusud chit, bahwa narit ulontuan nyoe, kon keuh narit nibak ureueng Acheh di lua nanggroe, atawa narit nibak ureueng Acheh di Amerika. Meunan chit haba nyoe, kon keuh narit nibak keularga rayek lon di Texas.

Jadi, beuthat pih na ide-ide nyang saban antara ulontuan deungon ide ureueng rame, dan ide organisasi atawa keulompok laen, dalam keuseumpatan go nyoe ulontuan hana lon dong sibagoe waki su ureueng rame atawa organisasi nyan.

Nyang keulhee, ulontuan bri thee bak ureueng droeneuh mandum, posting asli nibak tulesan ulontuan nyan, nakeuh atra nyang teulhat bak Facebook droe lon, deungon neuduek link:
https://www.facebook.com/notes/madi…

Seudangkan nyang teulhat bak website atawa akun-akun laen nyan, nakeuh atra nyang ka teupot nibak alamat diateuh bunoe.
Meunan keuh haba peuneuphon, jinoe lon keumeueng gisa bak peukara

“GAM, Wali, dan Partai: Bukan Milik Pribadi”.

Dumnan panyang narit nibak syeedara geutanyoe, Hasan Basri, yoh geubalah haba ulon, teuma peue keuh na syeedara nyan geupeukong bukti bahwa GAM, Wali, dan Partai nyan kon atra pribadi?

Bak lon kira, narit awai mantong hana lom lheueh geubri tanggapan, gohlom teupeuglah. Peue keuh deungon na tindakan dari saboh pihak, yakni dari Malek Mahmud, nyang ka dipeugadoh Institusi Majeulih di Acheh yoh watee GAM ban geumeunyeurah (geumeudame), nyan jeuet keu saboh bukti bahwa GAM jeuet keu hak ureueng Acheh?

Atawa seubalek jih, peue keuh nyan jeuet keu bukti bahwa GAM ka dikuasai le meupadum-padum droe ureueng sagai?

Chi syeedara Hasan Basri jaweueb dilee su-eue lon nyan, deungon jeunaweueb nyang paneuk mantong nyang leubeh kureueng meunoe: “nye nyan bukti GAM kon atra pribadi” atawa “kon, nyan han jeuet keu bukti GAM kon atra pribadi”.

Sabab, meunyo buet Malek nyang ka deungon arrogant dipeugadoh neuduek Majeulih, neubri keu ulon sibagoe bukti bahwa GAM kon hak pribadi, maka han mungken jeuet ek ulon teurimong.

Dan meunyo lam peunilaian droeneuh buet nyan ka nye jeuet keu bukti, maka na sipeue-peue nyang salah dari cara peunilaian droeneuh, nyang hana mungken jeuet tapeutupat di sinoe deungon cara rasional.
Tapi lon rasa, droeneuh keudroe neuthee bahwa buet nyan ka hana beutoi.

Sabab nyan keuh, lam tanggapan droeneuh, na neumeuceukot bahwa tindakan-tindakan nyang lagee nyan nakeuh tindakan dari saboh-saboh pihak nyang ka dipeungui nan GAM. Meunyo jeuet lon pinjam narit nyang neungui watee nyan, pihak-pihak nyan ka “dibajak” organisasi GAM. Nyan nye ka beutoi. Maka narit meunan baro leubeh rasional dan jeuet ulontuan teurimong.

Teuma, nyang jeuet keu su-eue ulontuan jinoe, peue keuh pihak nyang neuboh nan “pembajak” nyan hana saban ureueng ngon pihak nyang peubuet buet di Helsinki uroe jeh?

Fakta nyoe kon rahsia umum, dan chit hana teusom sapat! Chit pihak nyang neupeugah “membajak” GAM nyan keuh, nyang teken dame di Helsinki. Nyan hana pat bantah!

Jadi, meunyo buet awak nyan chit ka jeuet keu buet “pembajak” dan chit ka dari uroe jeh kon dipeungui tuboh GAM, peue keuh jeuet keu buet untok tasokong lagee-lagee nyan?

Meunyo buet nyang teungoh dipeulaku jinoe di Acheh han jeuet tangui, ka teuntee buet nyang dipeuwoe u Acheh yoh meudame nyan pih han mungken tateurimong.

Lom pih lagee nyoe, meunyo chit beutoi peue nyang ka neupeugah nyan, bahwa ureueng Acheh sep waki bak watee peugot buet di Helsinki, teuma peue lom nyang neumita dan peue lom nyang neupeureulee dari meupadum-padum droe treuk ureueng nyang tinggai, dari ureueng-ureueng nyang hana peureulee roh dalam buet Helsinki watee nyan, dan dari ureueng-ureueng nyang mantong na meukeusud Acheh meurdehka?

Peue keuh han sep 5 juta rakyat nyang meunurot droeneuh ka geusokong dame Helsinki nyan? Dumpeue ka na, MoU, UUPA, Partai, “Wali Nanggroe”, dana nyoe-jeh dan laen-laen lom, peue chit nyang kureueng lom?

Ulontuan lon thee, ureueng droeneuh ka hana saboh kheun le ngon ureueng nyang neu-anggap ka dipeungui nan GAM, Wali, dan partai di Acheh. Ureueng droeneuh keudroe sebeutoi jih ka neuteupeue bahwa GAM, Wali, dan partai jinoe kon le hak nibak rakyat Acheh.

Ka neukalon keudroe bahwa rakyat pih ka brat that geurasa bahwa GAM kon le representasi nibak ureueng Acheh, sabab GAM ka gadoh arah, seureuta hana meuho tujuan, dan bahkan ka gadoh uboe, eksistensi dan yum droe – meunan bak tingkat lokal, dan meunan chit bak tingkat internasional.

Nan artikel droeneuh chit neuboh “GAM, WALI, dan PARTAI: Bukan Milik Pribadi”, tapi lam asoe artikel neupeugah peue-peue laen. Buet nyang ka dipeugot le pihak-pihak meutentee nyan ka neukheun buet “pembajak”, teuma mantong chit neuharap rakyat geutem meusaboh ngon droeneuh untok peugot buet sot-sot nyang saban chit ngon buet “pembajak” nyan.

Lam keunira droeneuh, Acheh Merdehka nyan ka hana le. Ka sep ngon dame mantong.?

Lon peutroh teuma saboh peukara nyang ureueng droeneuh tuwo, atawa hana lom muphom. Rakyat geutem meusaboh di muyup partai yoh awai sabab geupike partai nyan nakeuh seunambong nibak buet peurjuangan AM. Jeuet mantong droeneuh neukheun, anggapan bahwa partai nyan seunambong nibak peurjuangan nakeuh anggapan nyang salah. Tapi nyan keuh narasi nyang sampoe ‘an jinoe mantong dingui untok ditre peusaboh rakyat di muyup partai.

Teuma watee geukalon le rakyat buet nyan ka kon, pane na geutem teuma roh lam parte-parte laen nyang hana meuho-saho. Ka teuntee geugisa dan geumita baresan nyang mantong dong meujuang untok AM. Meunan keuh takalon jinoe, sidroe droe ureueng nyan ka geugisa keulai u dalam gareh perjuangan Acheh Meurdehka.

Siblah thon leubeh ka GAM Helsinki nyan ka gadoh, jinoe ka neuk geutre peubeudoh keulai, tapi hana soe pakoe. Ureueng Acheh nyang ka geuplueng dari buet partai hana geumeusaboh ngon GAM nyang meunurot droe neuh ka leumoih nyan. Sabab nyan keuh jinoe, meupadum-padum droe ureueng di lua, nyang ka dari awaikon hana geusokong MoU, dan teutap geudong untok mardehka, ka deuh sibagoe ancaman. Ka deuh teuma dari meupadum-padum droe ureueng nyoe keuh, nyang na keuseumpatan bak uroe nyoe untok peusaboh keulai seueh AM.

Ulontuan yakin, cita-cita mulia Acheh Meurdehka hana tom leukang lam dada ureueng Acheh nyang ka roh geupeudong, geusokong, dan geupeulahra status De Facto di Acheh. Beuthat pih status nyan jinoe ka jeuet keu seujarah mantong sabab ka dipeugala lewat GAM persi MOU di Helsinki.

Maka ka seupatot jih ureueng droeneuh neukalon dan neudeungo peue nyang geupeureulee le bansa Acheh jinoe. Bek le neupeubataih ruweueng politek rakyat Acheh ‘ot bataih nyang ka dipeuna di Helsinki mantong.

Deungon nyan ulontuan yakin, akan sama-sama takalon bansa teuh geumeusaboh keulai di muyup peurjuangan AM lagee nyang ka-ka.
Meunan keuh narit dari ulontuan. Meunyo na Neubri keuseumpatan laen lom teuma akan ulon sambong lom.

Saleuem seulamat keu mandum syeedara. Assalamu’alaikum warahmatullahi wabarakatuh. Seunambong u artikel nyang geutuleh le Syeedara Hasan Basri:

http://www.acehtrend.co/gam-wali-pa…http://acehpeace.com/2016/12/21/tan…

Neususoen Uleh: Madinatul Fajar
Neu edit uleh: Tgk.Atjeh ACM

Comment

Leave a Reply

Your email address will not be published. Required fields are marked *

News Feed