by

REUDOEK KEU TUNGKAT, KILAT KEU SUWA

Daud beureueh, Yasin yang puwoe
Keunoe u nanggroe, bekle lam Rimba
Meumacam janji, yasin peusampoe
Asai beugeuwoe, bandum bekle lam rimba

Daud beureueh, dudoe geutem woe
Lake Acehnyoe , Hak Istimewa
Yasin geutanggoeng, ban lhe boeh bagoe
Beureueh geuwoe, hanle lam Rimba

Yang phoen Agama, ta uroeh keudroe
Pendidikan dudoe, meunyang keudua
Yang keu lhe adat, jipulang keunoe
Ta uroeh keudroe, hak istimewa

Wate beureueh, teuma ka geuwoe
Ban lhe boeh bagoe, takalon hana
Dudoe beurontak, Aceh lhe sagoe
Hasan Tiro woe, di nanggroe luar

Jak lake restu, beureueh sidroe
Aceh lhe sagoe, geukeunuek puga
Daud beureueh, geuyue duek keudroe
Bah Hasan Tiro, jinoe yang puga

Daud beureueh, restui dudoe
Buet Hasan Tiro, Angkat senjata
Seuramoe meukah, lake pisah droe
Aceh lhe sagoe, lake Merdeka

Masanyan keuphoen, karu lam nanggroe
Hasan Tiro woe, Kali keudua
Bak thoen tujoeh nam, Hasan Tiro woe
Deklasi lam nanggroe, Aceh Merdeka

Daud Beureuh, ka neuduek keudroe
Hana peuroeh droe, ka neu iem saja
Teutapi pusat, teutap jipantau
Bereueh Sidroe , ji mata mata

Hingga sampoe had, teuma oh dudoe
Beureueh Sidroe, jiba u jawa
Sinoe di Aceh, meutamah kasyoe
Buet Hasan Tiro, meuprang geupuga

Daud Beureueh, sabe lake woe
Keunoe u nanggroe, hajat geugisa
Thoen lapan dua, teuma oh dudoe
Beureuh jipuwoe, wate nazue ‘a

Kada padum thoen, teuma oh dudoe
Beureueh geuwoe, hadap yang Esa
Thoen lapan tujoeh, Beureueh geuwoe
Geutinggai nanggroe, lam haro hara

Senamboeng hayat, perjuangan nanggroe
Keu Hasan Tiro, pulang pusaka
Meuprang Politik, di lua nangroe
Di Aceh Sinoe, Meuprang Gerliya

Hingga Musibah, Aceh Lhe sagoe
Tsunami tampoe, seureuta Geumpa
Meutroen ilham, bak Tuhan sidroe
Aceh lhe sagoe, Dame troek teuka

Dame Hilsingke, teuma oh dudoe
Baro lam nanggroe, Aman sentosa
Rakyat ka seunang, Aman juet sagoe
Hana le kasyoe, ngoen prang saudara

Ohlhueh Hilsenki, wali pih geuwoe
Keunoe u Nanggroe, Aceh mulia
Kada padum thoen, gobnyan disinoe
Wali pih geuwoe, Hadap yang Esa

Oh tan le wali. Ka leupah geuwoe
Aceh lhe sagoe, pih leupah gura
Ka jimeupake, sabe keudroe droe
Ka maseng keudroe, kepruet jikira

Daud Beureueh, ngoen Hasan Tiro
Meumada Ohnoe, ulon calitra
Nyoepat dimiyueb, neubaca keudroe
Kalhueh lon pasoe, tinggai neubaca

Haba nasehat, bacut loen muproe
Lon peu ingat droe, deungoen saudara
Beujuet peu ingat, bandum geutanyoe
Hudep lam Bumoe, sit seumentara

Masa lam utuen, peujuang nanggroe
Saban geutanyoe, Nasib teuh sama
Meupakoen jinoe, ka laen bagoe
Ka Aman nanggroe, ka keudroe saja

Jasa Syuhada, hanle soe pakoe
Hanle soe hiroe, keu inoeng janda
Keu Anuek Yatim, pih tansoe pakoe
Meudeuek troe, hana soe kira

Dali takaloen, kondisi jinoe
Aceh lhe sagoe, sang prang saudara
Timbak meunimbak, sabe keudroe droe
Eungkhoe meu eungkhoe, sabe syedara

Meutan meu ubah, sabe lagenyoe
Bak Tuhan sidroe, tapreh troek bala
Puteng beuliong, neupeutroen keunoe
Neulungkop Bumoe, Pih mungken saja

Kadang ie Raya, neupeutroen keunoe
Jitamoeng Bumoe, sireutoeh deupa
Tuhan geu Azueb, Bandum geutanyoe
Aceh lhe sagoe, sabe lam Dosa

Ta lake lindoeng, bak Tuhan Sidroe
Aceh lhe sagoe, beujeuoh bak bala
E ya Tuhanku, peu Ampon kamoe
Seujak Uroenyoe, Taubat Nasuha

Ohnoe meumada, uloen hareutoe
Juet laen uroe, samboeng calitra
Meunyoe na salah, Peubeutoi keudroe
Peu meuah kamoe, yang susoen haba
Aneuk kuta syuhada

 

PENULIS : ZAKIR MUZAKIR

Comment

Leave a Reply

Your email address will not be published. Required fields are marked *

News Feed