ACMSeulamat Teuka di Website achehcybermilitary.org
Uncategorized

POLITIK TIKUS (POLITIKUS)

POLITIK TIKUS (POLITIKUS)

Saboh riwayat narit lon peutroh
di Nanggro jioh keu saboh bangsa
jiduek lam uruek ji eh dalam broh
Keu Bangsa tikoh haba lon rika

Tikoh dalam Blang atawa lampoh
Wajeb taparoh bek wahe sjedara
Glong jeuneurob tapageu lampoh
Taleet beu jioh bek lee ji teuka

Dilee kon udep di bangsa tikoh
Kayem jipiyoh lam uruek raya
Meuaneuk binoe sinan dalam broh
Hinan seumajoh pue-pue nyang hawa

Tapula ubi golom troh tanggoh
Kalheuh dijak kueh peureudei jiba
Pade tatabu keu bu ta pajoh
Troh bangsa tikoh ka jijak seuba

Leupah sengsara menyoe na tikoh
Habeh ji sampoh jagong keupila
Harkat ta udep sabe hana troh
Tabiat tikoh lagei nyan rupa

Jino hai abu jipeugah katroh
Rame dum tikoh yang troek di lua
Jicok hareukat bak luwah lampoh
Ka jak peuroh bak peutron keunira

Hak Aneuk yatim jitem jak sampoh
Jitem jak pajoh hak inong janda
wahe ulama neu mat peujampoh
Bagah neu paroh tikoh bek lee na

Menyoe teulat neumat peujampoh
Geutanyoe kiroeh sama sibangsa
Saweub diadu tanyoe meu soh-soh
Nyan cara tikoh bak reubot kuasa

Kadang e teungku neujak u lampoh
Meureumpok tikoh neuturi hana
Neu eu peulandok neupeugah tikoh
Mungken syit lapoh sisat lam paya

Ulee ji tincu iku ji haloh
Bulei bak tuboh rapoh lagoina
Misei ji panyang bagah that duroh
Tanda nyan tikoh bek na le dawa

Gigoe ji blah keu tajam dua boh
Bagah bak jikoh makanan raya
Punyueng ji rayeuk ruhueng diteungoh
Mangat bagah troh info bahaya

Neujak u Calang bak Gureutei neupiyoh
Troh u Meulaboh uroe ka Asa
Bek bi jabatan keu bangsa tikoh
Habeh ji pajoh harta neugara

di Glee Maheng Ureung meulampoh
ateuh gunong goh ureung meu rusa
Hai bansa aceh bu teugoeh teugoeh
nyan perte tikoh neulet u lua

meu macam bagou Cara let tikoh
racon jeut neuboh tikoh neu tuba
neu boh peurangkap tikoh mangat roh
mangat bek kiroh ngat senang bansa

Istana beugleh bek le na tikoh
tikoh neu paroh dalam peunjara
ngat seunang rakyat ekonomi leumoh
Bek sabe meh moh lagei yang ka ka

Angen sinja jipot u Meulaboh
Wate oh beungoh jipot u Banda
Mumada ohnoe hikayat tikoh
Haba ka putoh malam ka jula.

Uleh : Abu Simai

Related posts
Uncategorized

Aceh Bukan Indonesia

Rumah Kami Bukan Indonesia… Banyak Netizen Bertanya Terutama Netizen Yang Berada Di Luar Aceh. Seandainya Aceh Lepas ( Merdeka ) Dari Tangan…
Uncategorized

15 Agustus Hari Kemalangan Aceh, Bukan Hari Damai Aceh

“REFLEKSI 15 TAHUN MoU HELSINKI ( 15-8-2005 – 15-8-2020 ) Semua Rakyat Acheh hari ini menjadi Hakim / juri untuk menilai dan…
Uncategorized

DJAWABAN ULEÈ BIRO PENERANGAN TNAD WILAYAH ATJÉH RAJÈUK TERHADAP YANG MENGAKU DIRI KETURUNAN RAJA ACEH DARUSSALAM

Trok seu- eue dari Fb ” Adhari S ” Contoh2 sifeut kaom durhaka keu bangsa dan nanggroe, ; Kelompok Aceh Sumatra, Publoe…

Leave a Reply

Your email address will not be published. Required fields are marked *