by

Ca’e Atjeh Aneuk Jeumpa

Ca’e Atjeh

leupah that manyang pucok u mirah…
ujong jih teuplah meu keuprak duwa…
mate beu syahit pantang menyerah…
adak roe darah ulon pih rela…

jinoe that sayang aceh meutuwah…
rata daerah dum haro hara…
hana le kata yang sapu peugah…
ka abeh pecah dum aneuk bangsa…

aleh pemimpin yang kureung gagah…
aleh pih sumpah yang pajoh gata…
aleh pih ureung tan le amanah…
aleh bak rupah meuneuk duk tahta…

aleh ka lale deungoen rupiya…
aleh peutuwah hana geu jaga…
aleh cit umat kureung ‘ibadah…
aleh cit Allah tengoeh geu coba…

aleh pih aleh ka mandum salah…
bangsa yang ceudah karab binasa…
bangsa yang jameun dilee that meugah…
masa perintah Iskandar Muda…

rakyat dum makmu teuntra that gagah…
harom that meugah u nanggroe luwa…
raja seb ade yang bi perintah…
deungoen petuwah mandum ‘ulama…

wahe bangsa lon aceh meutuwah…
gisa beubagah bak marwah gata…
ka seb sengsara rakyat dum reubah…
jai that roe darah dum aneuk bangsa…

abeh meu siseu dum aneuk tan yah…
jai that geukeubah dum inoeng janda…
dum na keuh seudeh masa yang leupah…
ingat meutuwah bek tuwoe gata…

Tgk hasan tiro pih na geupeugah…
ingat sejarah hai aneuk bangsa…
bangsa geutanyoe bangsa yang gagah…
mandum penjajah tiyeup uluwa…

jinoe sang bak hi yang keu penjajah…
cit saboh darah kon bangsa luwa…
sabe keu droe droe ka ji meu plah plah…
yang wali peugah hana ji nit na…

wali geutanyoe auliya Allah…
cit hantom salah geu marit haba…
dum bangsa musoh tan jikheun salah…
pakon meutuwah tanyoe ta hina…

meuhan tapateh yang wali peugah…
jai that musibah yang tanyoe rasa…
nanggroe teuh anco ureung dum susah…
musoh that bebah tanyoe ji hina…

ji sipreuk peng grik nyak tameurupah…
nyak ta roe darah sa sabe bangsa…
memang that hayeu bangsa penjajah…
keumah ji papah ngoen propaganda…

jinoe geutanyoe bek salah langkah…
do’a bak Allah sabe ta pinta…
beuna pemimpin yang meu amanah…
beu neupeuleumah e ya Rabbana…

adak mantoeng na wali meutuwah…
mungken han pecah dum aneuk bangsa…
gobnyan ka geucok pulang le Allah…
moga aruwah beu roeh lam syurga…

Aamiin yaa rabbal’alamin………!!!

Penulis: Aneuk Jeumpa

Comment

Leave a Reply

Your email address will not be published. Required fields are marked *

News Feed